സൂപ്പർ സ്റ്റാർ രജനികാന്ത് നായകനാവുന്ന ജയിലർ ആഗസ്റ്റ് 10ന് കേരളത്തിൽ 310 സ്ക്രീനുകളിൽ പ്രദർശനത്തിന് എത്തും.രാവിലെ ആറിനാണ് ആദ്യ പ്രദർശനം. തമിഴ് നാട്ടിലും രാവിലെ ആറിന് ആദ്യ പ്രദർശനം ആരംഭിക്കും.ടിക്കറ്റ് ബുക്കിംഗ് മറ്റന്നാൾ ആരംഭിക്കും.
വിജയ് ചിത്രം ബീസ്റ്റിനുശേഷം നെൽസൻ സംവിധാനം ചെയ്യുന്ന ചിത്രത്തിൽ ജയിലർ മുത്തുവേൽ പാണ്ഡ്യൻ എന്ന കഥാപാത്രത്തെയാണ് രജനികാന്ത് അവതരിപ്പിക്കുന്നത്. രജനികാന്തും മോഹൻലാലും ആദ്യമായി ഒന്നിക്കുന്നു എന്നതാണ് ജയിലറിന്റെ ഏറ്റവും വലിയ സവിശേഷത. അതിനാൽ ഇരുവരുടെയും ആരാധകർ പതിന്മടങ്ങ് ആവേശത്തിലാണ്.അതിഥി വേഷത്തിലാണ് മോഹൻലാൽ എത്തുന്നത്.
എന്നാൽ ജയിലറിന്റെ ട്രെയിലറിൽ മോഹൻലാൽ പ്രത്യക്ഷപ്പെടുന്നില്ല.വിനായകനാണ് രജനികാന്തിന്റെ വില്ലൻ. തമന്ന നായികയായി എത്തുന്ന ചിത്രത്തിലെ കാവാല എന്ന ഗാനം ഇപ്പോഴും ട്രെൻഡിംഗിൽ മുന്നിൽ തന്നെയാണ്. രമ്യ കൃഷ്ണൻ, ശിവ്രാജ് കുമാർ, ജാക്കി ഷ്റോഫ്, സുനിൽ തുടങ്ങിയവരാണ് മറ്റു താരങ്ങൾ. വിജയ് കാർത്തിക് ഛായാഗ്രഹണം നിർവഹിക്കുന്നു. സ്റ്റണ്ട് ശിവയാണ് ആക്ഷൻ കൊറിയോഗ്രാഫർ. അനിരുദ്ധ് സംഗീത സംവിധാനം ഒരുക്കുന്നു.സൺ പിക്ചേഴ്സിന്റെ ബാനറിൽ കലാനിധി മാരൻ നിർമ്മിക്കുന്ന ചിത്രം ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് കേരളത്തിൽ വിതരണം. പി .ആർ .ഒ - ശബരി.
Post a Comment