മത്സ്യവിൽപനയുമായി ബന്ധപ്പെട്ട തർക്കത്തിനിടെ കോഴിപ്പുറം കായലാട്ട് ആദർശിനാണ് (23) വയറ്റിൽ കത്തികൊണ്ട് കുത്തേറ്റത്. മൊടക്കല്ലൂരിലെ മലബാർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ച ആദർശിനെ അടിയന്തര ശസ്ത്രക്രിയയ്ക്ക് വിധേയനാക്കി.
പുറക്കാട് റോഡിൽ കോഴിപ്പുറം ജങ്ഷനിൽ ബഹളംവെച്ച് മത്സ്യവിൽപ്പന നടത്തുന്നതും ദുർഗന്ധം വമിക്കുന്ന വെള്ളം പ്രദേശത്ത് ഒഴുക്കുന്നതുമായി ബന്ധപ്പെട്ട് സമീപവാസികൾ പരാതി ഉന്നയിച്ചിരുന്നു. ശനിയാഴ്ച വൈകുന്നേരം മത്സ്യവിൽപ്പന നടത്തുന്ന ശ്രീജയും മകൻ യദുപ്രസാദും നാട്ടുകാരും തമ്മിൽ ഇതുസംബന്ധിച്ച് തർക്കമായി. തർക്കത്തിനിടെ രാത്രി ഒമ്പതുമണിയോടെ ശ്രീജയും മകനും കോഴിപ്പുറം തച്ചറോത്ത് താഴെക്കുനി അനൂപിനെ വീട്ടിലെത്തി ആക്രമിക്കാൻ ശ്രമിക്കവേയാണ് ആദർശിന് കുത്തേറ്റത്.
യദുപ്രസാദിനെ കോടതിയിൽ ഹാജരാക്കിയശേഷം ജാമ്യത്തിൽ വിട്ടു. ഇന്ന് കോടതിയിൽ ഹാജരാകാൻ നിർദേശിച്ചിട്ടുണ്ടെന്നും കൊയിലാണ്ടി പൊലീസ് അറിയിച്ചു. സംഭവത്തിന് പിന്നാലെ പ്രതിയുടെ മത്സ്യവിൽപ്പന ഉപകരണങ്ങൾ തീയിട്ട നിലയിൽ കണ്ടെത്തി.
Post a Comment