കരിവെള്ളൂരിൽ വനിതാ പൊലീസ് ഉദ്യോഗസ്ഥയെ വീട്ടിൽ അതിക്രമിച്ച് കയറി വെട്ടിക്കൊന്നു. സംഭവത്തിൽ ഭർത്താവ് പിടിയിലായി. കരിവെള്ളൂർ പലിയേരി സ്വദേശി ദിവ്യശ്രീ ആണ് കൊല്ലപ്പെട്ടത്. ഭർത്താവ് ഓട്ടോ ഡ്രൈവറായ രാജേഷ് ആണ് പിടിയിലായത്. കാസര്‍കോട് ചന്തേര പൊലീസ് സ്റ്റേഷൻ സി പി ഒയാണ് കൊല്ലപ്പെട്ട ദിവ്യശ്രീ. ദിവ്യശ്രീയുടെ അച്ഛനെയും രാജേഷ് വെട്ടി പരിക്കേല്‍പ്പിച്ചു.ദിവ്യശ്രീയുടെ അച്ഛൻ വാസുവിന് വയറിനും കയ്യിനുമാണ് വെട്ടേറ്റത്. ഇദ്ദേഹത്തെ പരിയാരം മെഡിക്കൽ കോളേജിലേക്ക് മാറ്റി. ഇന്നലെ വൈകുന്നേരം 6 മണിയോടെയാണ് നാടിനെ നടുക്കിയ സംഭവം.വ്യാഴാഴ്‌ച വൈകീട്ടോടെയാണ് രാജേഷ് ആക്രമണം നടത്തിയത്. ആസൂത്രിത കൊലപാതകമാണ് അരങ്ങേറിയത് എന്നാണ് പോലീസിന്റെ പ്രാഥമിക വിലയിരുത്തൽ. കൊല നടത്താനായി പെട്രോളും കൊടുവാളുമായി രാജേഷ് വീട്ടിലെത്തുകയായിരുന്നു. പെട്രോൾ ദിവ്യശ്രീയുടെ ദേഹത്ത് ഒഴിക്കാൻ ശ്രമിച്ചെങ്കിലും അതു വിജയിച്ചില്ല.പിന്നാലെ കഴുത്തിനു വെട്ടുകയായിരുന്നു. ഇതു തടയാൻ ശ്രമിച്ചപ്പോൾ കൈകൾക്കും വെട്ടേറ്റു.
കൊലപാതകത്തിനു ശേഷം ഒളിവിൽ പോയ രാജേഷിനെ പുതിയ തെരുവിലെ ബാറിൽ നിന്ന് പോലീസ് പിടികൂടുകയായിരുന്നു. ആക്രമണം തടയാൻ ശ്രമിക്കുന്നതിനിടെയാണ് ദിവ്യശ്രീയുടെ അച്ഛന് പരിക്കേറ്റത്.
Post a Comment